దాండియా తర్వాత డ్రెస్సుల రిటర్న్: వీడియో వైరల్, నెటిజన్ల ఆగ్రహం!

ఆన్‌లైన్ షాపింగ్ అందుబాటులోకి వచ్చాక కొత్త కొత్త ట్రెండ్లు పుట్టుకొస్తున్నాయి. అందులో కొన్ని వివాదాలకు దారితీస్తున్నాయి. తాజాగా, నవరాత్రి, దాండియా వేడుకలు ముగిసిన వెంటనే, వేలాది మంది తమ పండగ డ్రెస్సులను రిటర్న్ చేస్తున్న వైనం సోషల్ మీడియాలో పెద్ద దుమారం రేపుతోంది. దీనికి సంబంధించిన ఓ వీడియో ఇప్పుడు ఇంటర్నెట్‌లో వైరల్‌గా మారింది.

నిశాంత్ చాంత్ అనే 'ఎక్స్' యూజర్ షేర్ చేసిన వీడియోలో, ఓ రెసిడెన్షియల్ కాంప్లెక్స్‌లో డెలివరీ ఏజెంట్ రిటర్న్ పార్శిళ్లను సేకరిస్తున్న దృశ్యాలు చూడొచ్చు. షట్టర్ కింద, భవనాల మధ్య, చెట్ల పక్కన, ఎక్కడ చూసినా పార్శిళ్ల గుట్టలు పడి ఉన్నాయి. ఓ పెద్ద బ్యాగు నిండా రిటర్న్ ప్యాకేజీలు ఉండగా, మరికొన్ని బస్తాల్లో నింపి తరలిస్తున్నారు. కొండను తలపిస్తున్న ఈ పార్శిళ్ల కుప్పను చూసి డెలివరీ ఏజెంట్ సైతం ఆశ్చర్యపోయారు. ఈ పార్శిళ్లన్నీ దాండియా వేడుకల కోసం కొనుగోలు చేసిన దుస్తులవేనని స్పష్టమవుతోంది.

ఈ వీడియోకు 'దాండియా ఖతం... డ్రెస్ రిటర్న్. సిగ్గులేని తరం' అనే క్యాప్షన్ జోడించారు. పండగలు, ప్రత్యేక సందర్భాల కోసం ఖరీదైన దుస్తులను ఆన్‌లైన్‌లో కొనుగోలు చేయడం, ఆ కార్యక్రమం ముగియగానే వాటిని తిరిగి వాపస్ పంపే (రిటర్న్) కల్చర్ పెరిగిపోతోందన్న విమర్శలకు ఈ వీడియో బలం చేకూర్చింది.

ఈ వీడియోలో విజువల్స్ పై నెటిజన్లు తీవ్ర ఆగ్రహం వ్యక్తం చేస్తున్నారు. ఇది నైతికంగా సరైంది కాదని, ఇలాంటి చర్యల వల్ల చిన్న వ్యాపారులు, అమ్మకందారులు తీవ్రంగా నష్టపోతారని పలువురు కామెంట్ చేస్తున్నారు. "కొంతమంది పండగకు బట్టలు కొనలేక ఇబ్బంది పడుతుంటే, మరికొందరు వేడుకల్లో గొప్పల కోసం డ్రెస్సులు కొని వాపస్ ఇస్తున్నారు" అంటూ ఓ యూజర్ ఆవేదన వ్యక్తం చేశారు. "ఇలాంటి వారి వల్లే కంపెనీలు 24 గంటల రిటర్న్ పాలసీలు పెడుతున్నాయి" అని మరొకరు వ్యంగ్యంగా వ్యాఖ్యానించారు. అమ్మకందారుల శ్రమను, ఖర్చును ఏమాత్రం పట్టించుకోకపోవడం దారుణమని మరికొందరు విమర్శించారు.

మొత్తం మీద, ఈ ఘటన ఆన్‌లైన్ షాపింగ్ సౌలభ్యాన్ని కొందరు ఎలా దుర్వినియోగం చేస్తున్నారో తెలియజేస్తోంది. ఈ "వేర్ అండ్ రిటర్న్" ట్రెండ్ ఈ-కామర్స్ వ్యవస్థపై, ముఖ్యంగా అమ్మకందారులపై చూపే ప్రతికూల ప్రభావంపై విస్తృతమైన చర్చకు దారితీసింది.